News
ELIN BRIMHEIM HEINESEN FYRISTØÐUFÓLK Á LJÓÐBÓKATÆNASTUNI
Tann 16. apríl byrjaði Elin Brimheim Heinesen í starvi sum fyristøðufólk á Ljóðbókatænastuni hjá Landsbókasavninum.
Uppgávurnar hjá Ljóðbókatænastuni eru at útvega ljóðbøkur o.a. tilfar til teirra, sum av eini ella aðrari orsøk ikki fáa lisið ella á annan hátt fáa ognað sær vanligan prentaðan tekst. Somuleiðis skal ljóðbókatænastan skipa fyri, at tilfar av nevnda slagi verður atgeingiligt hjá brúkarunum á bókasøvnum landsins.Virksemið hjá Ljóðbókatænastuni verður lagt til rættis saman við Ljóðbókanevndini, sum er mannað við umboðum fyri Landsbókasavnið, Sjóndepilin, Nám, Býarbókasavnið, Føroya Blindafelag, Meginfelag teirra Brekaðu og Felagið fyri lesi- og skriviveik og orðblindafelagið.
Elin Brimheim Heinesen er fødd 25. juni 1958 í Tórshavn. Hon er cand.mag. í fagurfrøði og mentan við hjágrein í føroyskum máli og bókmentum. Harumframt hevur hon útbúgving sum filmshandritahøvundur frá Den Danske Filmskole og í vinnubúskapi frá Copenhagen Business School.
Elin hevur arbeitt bæði í Danmark og í Føroyum við miðling, samskifti, marknaðarføring og fyriskipan í mong ár og hevur drúgvar royndir við bæði prentaðum miðlum, loftmiðlum og netmiðlum sum journalistur, ritstjóri og útgevari, umframt at hon hevur verið virkin innan tónleik og aðra mentan.