Bókasavnsgjald er ein samsýning, sum landið letur føroyskum høvundum fyri at hava bøkur teirra tøkar á føroysku bókasøvnunum. Gjaldið verður útgoldið sum B-inntøka.

Við høvund meinast rithøvundur, tónaskald, týðari, myndlistafólk ella fotografur, sum býr í Føroyum ella uttanlands, og sum ávikavist skrivar, týðir ella prýðir føroyskar bøkur.

Bókasavnsgjaldið verður at býta til føroyskar rithøvundar og týðarar, hvørs bøkur/týðingar eru til taks í bókasøvnunum, og til myndlistafólk, tá myndir eru í minsta lagi 40% av bókini.

Í "Reglugerð fyri býtið av bókasavnsgjaldinum" frá 15. juli 2003 er ásett, hvussu játtanin til endamálið skal býtast.

Høvuðsreglan er at bókasavnsgjald verður útroknað eftir, hvussu nógvar bøkur ein høvundur hevði tøkar til alment útlán á føroysku bókasøvnunum tann 31. desember árið fyri.

 

• Fleiri enn 50 bøkur tøkar til alment útlán.
• Bókin hevur minst 17 síður.
• Ljóðbøkur og annað tilfar sum t.d. filmar og fløgur, ið er til útláns, verður roknað sum vanligar bøkur.
• Myndlistafólk hava rætt til gjald, tá myndirnar eru í minsta lagi 40% av bókini.
• Um tað eru 2 ella 3 høvundar knýttir at sama verki, verður gjaldið býtt javnt teirra millum.
• Um tað eru fleiri enn 3 høvundar knýttir at sama verki, verður einki gjald latið.
• Ritstjórar kunnu verða roknaðir sum høvundar, tá ið týðandi sjálvstøðugt arbeiði er lagt í verkið.
• 1/3 av játtaðu upphæddini verður latin fyri týðingar.
• Týðarin fær hálvt gjald.
• Týðarin fær triðings gjald, tá talan er um týddar myndabøkur.
• Eftirlivandi hjúnafelagi varðveitir rættin til bókasavnsgjald.
• Tá eftirlivandi hjúnafelagi doyr, fáa avvarðandi ta síðsta gjaldið útgoldið.

 

Tað er ikki neyðugt at melda seg til at fáa bókasavnsgjald. Landsbókasavnið skrásettir nýggjar høvundar so hvørt og bøkurnar verða somuleiðis taldar árliga. Um tínir upplýsingar eru broyttir síðan síðsta útgjald ella um tygum skulu hava bókasavnsgjaldið á fyrsta sinni, er neyðugt at fylla út skjalið niðanfyri "bókasavnsgjald skráseting".

Landsbókasavnið stendur fyri uppteljingini, ger metingar um, hvørjar bøkur lúka treytirnar og skipar fyri útgjaldinum.

Talt verður upp í bókasavnsskipanini Reindex, har flestu føroysku bókasøvnini skráseta sínar bøkur. Býarbókasavnið og Nám nýta ikki somu skipanina og telja sostatt sjálvi upp fyri sítt viðkomandi. 

Reglugerð frá 15. juli 2003 fyri býtið av bókasavnsgjaldinum