Maria R. Mikkelsen skrivaði handritini eftir handritunum, sum Sv. Grundtvig og Jørgen Bloch skrivaðu frá 1872 til 1876. Arbeiðið hjá Grundtvig og Bloch varð fíggjað av Hjelmstejerne-Rosencroneske grunninum í Keypmannahavn.

Í hesum verki eru allir tekstir við Hammershaimbs stavseting, ofta við upprunaligum formum á breddunum. Grundtvigs og Blochs handrit, sum eru varðveitt á Kongaliga bókasavninum í Keypmannahavn (DFS 1889/018), eru grundarlagið fyri útgávuni av føroyskum kvæðum hjá Universitets-Jubilæets Danske Samfund, sum fór til prentingar í 1941 við heitinum: “Føroya kvæði: Corpus carminum Færoensium”.

Á Landsbókasavninum varðveita vit tey bindini, sum Maria var í gongd við at skriva, tá ið avgjørt var at prenta kvæðasavnið. Hon kundi ikki vita, at bíðitíðin varð uml. 30 ár.

“Í 1913 bað stjórnin fyri Landsbókasavnið, (ið tá nevndist Færø Amts Bibliotek) Mariu R. Mikkelsen, arkivassistent, um at skriva av Føroya kvæði, Corpus carminum Faeroensium. Og hon fór undir at skriva hetta verk, men skrivaði bert tey 9 fyrstu bindini og tvey supplementsbind. Orsøkin til at hon helt uppat var, at avgjørt var at prenta alt kvæðasavnið í heilum líki [...] og hildið var, at ovdýrt var at lata pening samstundis til eina avskrift, sum ikki beinleiðis var neyðug. Universitetsbiblioteket í Oslo hevur eitt eintak av Corpus carminum Faeroensium, (ið tilsamans er eini 18 bind og einar 8000 síður), sum Maria hevur skrivað til teirra.“

(Úr: Kvinnutíðindi, september 1956, nr. 4, s. 3).

Landsbókasavnið eigur eisini innbundin avrit av handritunum hjá Grundtvig og Bloch.

Talgild útgáva av handritunum kann síggjast á netinum her.

Forsíðan til handritini hjá Grundtvig og Bloch

: Innihald í bind I til handritini hjá Grundtvig og Bloch

Innihald til bind I, skrivað av Mariu R. Mikkelsen

Her eru bind I til handritini hjá Mariu og avritini hjá Grundtvig og Bloch