Hóast bókavørðir í mong ár hava havt einstøk skeið og kunning fyri lesandi, m.a. um at finna hóskandi fakligt tilfar til uppgávur og gransking, so var hetta í dag eitt stig longri á leið. Í dag byrjaði eitt samstarv við Setrið, har Landsbokasavnið stendur fyri einum heilum skeiði til lesandi, og er hetta fyrstu ferð at tað hendir. Lesandi fara at møta á Landsbókasavninum hvønn týsmorgun í februar og mars.

Samstarvið er komið í lag eftir at Landsbókasavnið formliga er blivið universitetsbókasavn í 2024, og tí er farið undir eina menning av virkseminum og samstarvinum við Setrið. Tað var Erland Viberg Joensen, útbúgvingarleiðari á Søgu- og Samfelagsdeildini, sum vendi sær til Landsbókasavnið við ynski um undirvísingina. Vit á Landsbókasavninum fegnast um álitið og møguleikan, sum er eitt stórt stig í menningini av universitetsbókasavninum og samstarvinum millum stovnarnar báðar. Vit síggja hetta eisini sum ein kærkomnan møguleika fyri framhaldandi fakligari menning av okkara starvsfólkum.