Uppgávur & endamál

Í Føroydeild (Feroica) verður goymt ymiskt forkunnugt tilfar, frá tí at fyrsta føroyska bókin kom út í 1822 ("Færøiske Qvæder om Sigurd Fofnersbane og hans Æt : med et Anhang") og eldri, og fram til í dag. Deildin hevur sum uppgávu at savna, skráseta og goyma allar føroyskar bókmentir og alt, sum er skrivað av bókmentum um Føroyar og av føroyingum. Talan er bæði um upprunaføroyskt og útlandskt tilfar. Endamálið við hesi uppgávu er at varðveita ein týðandi part av føroyska mentanararvinum til komandi tíðir.

Uppgávan fevnir ikki bara um bøkur, bløð og tíðarrit, men eisini um ljóðbøkur, filmar, tónleikaútgávur, handrit, plakatir, sjónleikir, álit, serritgerðir, smáprent (t.d. valskráir, lýsingabløð og faldarar), spøl og talgildar teldutøkar útgávur so sum e-bøkur, ritgerðir, greinir o.tl.,umframt føroyskar heimasiður. Føroyadeildin tekur eisini ímóti ritgerðum á kandidat-, master- ella ph.d.støði, um ritgerðin er skrivað av føroyingi ella er um føroysk viðurskifti.

Lat okkum tína ritgerð sum pdf-fíla, og legg hetta skjalið við. 

Tilfar, ið ikki kemur undir reglurnar um skylduavhending t.d.ikki útgivið tilfar, ritgerðir, handrit og útlandskt tilfar, verður antin keypt ella umbiðið av Landsbókasavninum.

Av tilfari ið kemur inn gjøgnum skylduavhending, blíva tvey eintøk av prentaða tilfarinum varðveitt. Eitt eintak verður varðveitt í goymsluni á Landsbókasavninum. Hitt eintakið verður goymt í 2. skyldubókasavni, ið er ein goymsla uttan fyri stovnin. 

Tænastur

Øll hava atgongd at síggja tilfar, sum er í varðveitslu í Føroyadeild, um ikki annað er tilskilað. Tó ber ikki til at læna tilfarið heim við. Bílegg tið at síggja handrit og annað tilfar við at fylla út skjalið  Bílegg tíð at síggja tilfar úr føroyadeild og lat okkum tað. Sí annars reglur viðvíkjandi nýtslu av føroyadeild/handrit her: Reglur fyri lán úr føroyadeild og handrit

Í leitiskipanini bokasavn.fo er atgongd til tað mesta av talgilda tilfarinum, sum er skrásett og goymt í Føroyadeild.

Í einstøkum førum kann atgeingi til tilfar í føroyadeild/handrit vera avmarkað, og tá krevst serstakt loyvi til at síggja tilfarið, - tað verið seg bæði prentað ella talgildað tilfar.

Fyri kunning um avhending av tilfari til Landsbókasavnið, sí Skylduavhending

Vantandi bøkur

Tíverri eydnast tað okkum ikki altíð at fáa fatur á bókum og øðrum tilfari til føroyadeildina. Tað kann vera bæði skylda sum vit ikki fáa inn, ella útlendskt tilfar um Føroyar, ið kann vera torført at fáa fatur á. 

Leita her, um tú veist um líknandi tilfar, ið tú metir átti at havt okkara áhuga: bokasavn.fo

Um tú finnur fram tilfarið í leitiskipanini, men tað er frámerkt  'DESIDERATA' undir uppstilling, merkir hetta, at vit ynskja tilfarið, men hava ikki fingið fatur á tí. Send okkum tá eina fráboðan á lbs@landsbokasavnid.fo