24.-25. nov. 2018 - Lurtistova

Á Bókadøgunum fer Landsbókasavnið at varpa ljós á týdningin av ljóðbókum, umframt at stimbra lurtihugin hjá fólki. Fólk – børn og ung so væl sum eldri - kunnu fara inn í hugnaligu lurtistovuna, seta seg væl til rættis í sofunum og lurta eftir ljóðbókum í friði og náðum. Í lurtistovuni verður eisini ymiskt annað, sum stimbrar og eggjar lurtihugin hjá fólki. Pláss er fyri átta fólkum í senn. Har verða sofur og avspælarar, umframt smátalarar. Fólk verða til staðar at hjálpa ljóðbókalurtarunum at finna søgur at lurta eftir.

25. nov. kl. 15. Fyrilestur og kjak: Hví hava ljóðbøkur so stóran týdning

Landsbókasavnið varpar ljós á týdningin av ljóðbókum. Elin Brimheim Heinesen, fyristøðufólk, heldur fyrst ein lítlan fyrilestur sum íblástur til kjak. Beint eftir fyrilesturin verður pallborðskjak við umboðum fyri ljóðbókabrúkarar og onnur, sum hava við ljóðbókaøkið at gera. 

Endamálið við fyrilestrinum og pallborðskjakinum er at varpa ljós á vaksandi tørvin á ljóðbókum, hví so nógv hava brúk fyri ljóðbókum, hvørji tey eru, umframt vísa á, hví tað er so umráðandi, at størri játtan verður sett av til ljóðbókaframleiðslu og útbreiðslu.

Frágreiðing, fyrilestur og pallborðskjak um ljóðbøkur

Á Bókadøgunum var áhugavert tiltak við fyrilestri og pallborðskjaki sunnudagin 25. november 2018 kl. 15.00-16.00 í Skálanum í Norðurlandahúsinum, sum Landsbókasavnið skipaði fyri. Landsstýrið og onnur áhugað fingu í hesum sambandi handað eina frágreiðing , sum Elin Brimheim Heinesen, ljóðbókafyristøðufólk, hevur skrivað um støðuna á ljóðbókaøkinum í Føroyum í løtuni.

Fyrilesturin og pallborðskjakið tóku útgangsstøði í frágreiðingini. Til ber at lesa frágreiðingina, umframt lurta eftir fyrilestrinum og pallborðskjakinum niðast á hesi síðu.

Fyrst helt Elin Brimheim Heinesen, ljóðbókafyristøðufólk á Landsbókasavninum, fyrilestur við heitinum "Hví hava ljóðbøkur so stóran týdning - og hvat kann gerast á økinum framyvir?" sum upplegg til eftirfylgjandi pallborðskjak.

Frágreiðingin lýsir hvørjir ljóðbókabrúkararnir eru og teirra stóra ónøktaða tørv á ljóðbókum. Harumframt lýsir hon viðkomandi ivaspurningar, sum politiska skipanin má taka stig til at svara, um føroyska ljóðbókatænastan skal gerast tíðarhóskandi. Niðurstøðan í frágreiðingini inniheldur nøkur ítøkilig tilmæli til, hvat politiska skipanin kann fara undir at gera her og nú - og framyvir. Tað var hetta, sum pallborðsluttakararnir umrøddu.

Eftir kjakið kundu øll, sum ynsktu tað, ogna sær eitt eintak av frágreiðingini.

Hesi luttóku í pallborðskjakinum:

• Eyðgunn Samuelsen, landsstýriskvinna í Almannamálum
• Hanna Jensen, forkvinna í Mentanarnevnd Løgtingsins
• Magnus Rasmussen, varalimur fyri Bjørn Kalsø í Mentanarnevnd Løgtingsins
• Annita á Fríðriksmørk, fyri Katrin Kallsberg, forkvinnu í Trivnaðarnevnd Løgtingsins
• Karin Kass, stjóri í Sjóndeplinum
• Tórun Sumberg, blindur ljóðbókabrúkari og forkvinna í Blindafelagnum
• Annika Katrin Joensen, forkvinna í Orðblindalærarafelagnum

Rigmor Dam, landsstýriskvinna í Mentamálum fekk forfall

Sissal Kampmann, høvundur og útvarpsfólk var orðstýrari.

Niðanfyri eru leinki til omanfyrinevndu frágreiðing og fyrilesturin hjá Elini sum PDF-fíla, umframt ljóðfílur við fyrilestrinum og pallborðskjakinum aftaná. Harumframt er leinki til ein nýggjan faldara um ljóðbøkur.

"Hví hava ljóðbøkur so stóran týdning?" - fyrilestur eftir Elina Brimheim Heinesen

• Fyrilestur eftir Elin B. Heinesen Bokadagar 2018.pdf

Niðanfyri ber til at lurta eftir fyrilestrinum hjá Elini Brimheim Heinesen, umframt eftir eftirfylgjandi pallborðskjakinum.

Í sendingini Nón, sum varð send 21. november 2018, vóru Bókadagarnir 2018 í Norðurlandahúsinum umrøddir. Landsbókasavnið nýtti, sum kunnugt, høvið til at varpa ljós á ljóðbókaøkið á Bókadøgunum. 

Lurta m.a. eftir hesi samrøðuni, sum Sissal Kampmann hevði við Elina Brimheim Heinesen, ljóðbókafyristøðufólk, um ljóðbøkur og týdning teirra, í nevndu sending HER.