Tvær framsýningar

21. mai 2024

Tjóvstarta mentanarnáttina á Landsbókasavninum fríggjadagin 7. juni

Á Landsbókasavninum eru vit so heppin at hava 60 myndir, sum danska listakvinnan Flora Heilmann hevur gjørt. Flora Heilmann búði í Ónagerði á Viðareiði árini 1896-1906, meðan maður hennara var prestur har.
Myndirnar á framsýningini eru allar málaðar í tíðarskeiðnum 1903-1931, og tær eru partur av eini gávu, sum Flora Heilmann gav Landsbókasavninum í 1931. Myndirnar vísa okkum ta gomlu føroysku húsabyggingina og gomlu føroysk bygdarløg. Myndirnar hava fingið nýggjar rammur og eftir rúma tíð, eru myndirnar komnar at hanga í okkara Florustovu, har almenningurin ikki dagliga hevur atgongd. Tann 7. juni lata vit tó dyrnar upp fyri øllum áhugaðum.

Í forhøllini sýnir høvundurin og listafólkið Rakel Helmsdal fram. Henda framsýning lat upp tann 19. februar og stendur uppi til hálvan august í ár. Framsýningin, sum ber heitið Dreymsmiðjan, er ein prosessframsýning við verkum um at smíða dreymar. Her eru fyrst og fremst verk, har samband er millum tekst og mynd, antin tekstir, sum koma av myndum ella myndir, sum koma av tekstum, ella myndir og tekstir, sum eru risin upp úr somu tankasamanrenningum. Tað eru stuttsøgur, skaldsøgur, yrkingar og sjónleikir, listagrafisk prent og trývíddarverk. Elsta verkið er Veiða vind og Toran gongur tað nýggjasta, meðan leikurin Dreymsjóneyka er eitt verk í gerð.

Til ber at vitja framsýningarnar, meðan bókasavnið er opið.

Á mentanarnáttini, fríggjadagin 7. juni er opið frá kl. 8.30 til 17.00

- Hjartaliga vælkomin.


Aftur til tíðindi
Skrivað: Svend Højgaard

Seinastu greinar

Filmstriben – til øll við lánarakorti frá føroyskum bókasøvnum

Filmstriben er talgilt filmstilboð við breiðum úrvali av spælifilmum, stutt- og heimildarfilmum til børn, ung og vaksin. Tú fin… Les meira »


08. juli 2024
Føroyskar ljóðbøkur til børn eru komnar á eReolen GO

Á eReolen GO, sum er talgildi pallurin hjá donsku fólkabókasøvnunum til børn millum 7-14 ár, finnur tú nú eisini føroyskar ljóðbøk… Les meira »


25. juni 2024