Bøkur bæði til børn og vaksin fáa mótstøðu frá borgarum og myndugleikum, í hesum døgum eru tað serliga bókmentir um kyn og samleika, ið birta til kjak. Í USA er bókin Gender Queer eftir Maiu Kobabe mest bannaða bókin í løtuni. Talan er um eina “graphic novel” til ung um at finna seg sjálvt sum non-biner. Men bøkur, ið finnast at valdi, rasustríðsmálum og átrúnaðarligum trábeitni, verða eisini sensureraðar. Kinesiski listamaðurin Ai Weiwei noyddist at flýggja til Portugal, eftir at hann í síni sjálvsævisøgu ákærdi kommunistaflokkin fyri mutur. Nobelprísvinnarin Svetlana Aleksijevitj fær ikki sínar bøkur útgivnar í Belarus, tí hon lýsir lívið hjá vanligum menniskjum í einum einaræðisstýri. Sjálvt Harry Potter bøkurnar eru bannaðar fleiri staðni m.a. í Bulgaria, Sameindu Arabisku Emiratinum, Grikkalandi og í fleiri skúlum og bókasøvnum í USA. Atfinningarsamar røddir siga, at røðin presenterar satanismu og ger gjøldur burturúr kristindóminum.

Orðaskifti um føroyskar bøkur

Í Føroyum eru vit ikki von at banna bøkur, men vit hava fleiri ferðir upplivað at bøkur, bæði týddar og upprunaføroyskar elva til stórt kjak í føroyska samfelagnum. Eisini her hjá okkum hava orsøkirnar verið ymiskar, tær fevna eitt nú um átrúnað, rasu, kyn og samleika. Á borðinum liggja fýra ymiskar bøkur, sum kjakast hevur verið um, bæði á netinum, í lesarabrøvum og á tingsins røðarapalli.

Vit hava valt fýra ymiskar bøkur, sum kjakast hevur verið um, bæði á netinum, í lesarabrøvum og á tingsins røðarapalli. Í 1978 vórðu tvey mál løgd fram í Løgtinginum, ið bæði snúðu seg um at mótmæla, at Norðurlandaráðið veitti stuðul til týðing av svensku barnabókini Kammerat Jesus til føroyskt. Løgtingið samtykti einmælt at mótmæla at mentunargrunnur norðurlandaráðsins stuðlaði útgávuni. Í bløðunum var eisini heitt kjak um týðingina av bókini, lesarabrøv vóru bæði fyri og ímóti týðingini. Bókin Javnlíkin Jesus kom út á føroyskum í 1979 á forlagnum Hitt Føroyska Studentafelagið í Keypmannahavn. Bókin Hin stóra bókin um familjur kom út í 2011 á forlagnum Bókadeild Føroya Lærarafelags, og eisini henda útgávan elvdi til kjak. Í 2013 varð lesarabræv skrivað, har heitt varð á dagstovnar um at beina bókina burtur, eisini vóru løgtingsfólk í Degi og viku og kjakaðust um bókin var hóskandi at hava á stovnum ella ikki. Høgni Mohr gav í 2022 út bókina Saga Jam, bókin skapti mikla øsing í føroyska samfelagnum, serliga á sosialu miðlunum. Á vári 2024 vann Høgni Mohr lesaravirðislønina hjá teimum føroysku bókasøvnunum fyri bókina Saga Jam. Fyrr í ár kom bókin 'Vit kunnu takka nekarunum fyri tónleikin' eftir Rana Nolsøe út. Í hesum føri var tað ikki sjálv bókin, ið elvdi til kjak, men heldur heitið á bókini.

Les meira um danska PEN, átakið #BannaðarBøkur
og síggj listan av bannaðum bókum, ið danska PEN
hevur savnað við at fara á danskpen.dk