Í fráboðan um stuðul til menning av fólkabókasavnstænastum 30. august 2024 boðaði Sirið Stenberg, landstýriskvinna í almanna- og mentamálum frá, at í minsta lagi 434 tús. kr. fóru at verða settar av til at keypa føroyskar bøkur til menning av fólkabókasavnstænastum í kommununum. Stuðulin verður latin sambært kunngerð nr. 72 frá 18. juni 2024 um stuðul til menning av  fólkabókasavnstænastum. Endamálið við stuðlinum er at fáa nýggjar føroyskar bøkur út til allar borgarar í landinum.

Kommunur kunnu søkja um stuðul til bøkur sum eru ella verða keyptar í 2025. Stuðulin verður eftir ætlan býttur soleiðis:

Kommunur, har eingin fólkabókasavnstænasta er, upp til kr. 7.500

Kommunur, ið veita ávísar fólkabókasavnstænastur, upp til kr. 20.000

Klaksvík og Runavík, upp til kr. 55.000

Tórshavn, upp til kr. 80.000

Vil ein kommuna ikki søkja um stuðul til keyp av føroyskum bókum, kann kommunan lata stuðulin til veitarakommununa, um avtala er gjørd millum kommunurnar um hetta.

Kommunurnar standa sjálvar fyri keyp av føroyskum bókum. Stuðulin verður fluttur, tá kvittan fyri keyp av føroyskum bókum er Landsbókasavninum í hendi.

Endurgjald fæst fyri føroyskar bøkur keyptar í 2025. Eru føroyskar bøkur keyptar umvegis Landsbókasavnið, kann upphæddin verða mótroknað.

Umsókn um stuðul skal sendast Landsbókasavninum í seinasta lagið 1. november 2025. Eru spurningar, eru tit vælkomin at venda tykkum til Landsbókasavnið.