JØRGEN-FRANTZ JACOBSEN 125 ár

Í dag, 29. november eru tað 125 ár síðani Jørgen-Frantz Jacobsen varð borin í heim. Jørgen-Frantz er mest kendur fyri skaldsøguna Barbara, ið kom út í 1939, eitt ár eftir deyða hansara. Chr. Matras føroyskaði bókina í 1972 við heitinum Barba og harra Pál.

Sum heilt ungur fór Jørgen-Frantz til Danmarkar at ganga í skúla. Men longu tá hann var fyrst í 20’inum bleiv hann raktur av sjúkuni tuberklum, og stríddist við sjúkuna fram til 24. mars 1938, tá hann andaðist bert 37 ára gamal.

Landsbókasavnið hevur nøkur brøv og handrit hjá Jørgen-Frantz í varðveitslu, umframt upprunahandritið til skaldsøguna Barbara.

Í framsýningini vísa vit eitt úrval av brøvum hansara til mammu sína. Sum barn gjørdi hann eisini tvær hondskrivaðar bøkur til mammuna, ið vit hava valt at vísa fram.