Ert tú bókasavnsfólk?

Sum høvuðsbókasavn fyri alt landið veitir Landsbókasavnið bókasavnstænastur til øll onnur bókasøvn í landinum. Landsbókasavnið hevur eftirlit við fólkabókasøvnunum og veitir ráð og leiðbeining.

Innkeypsdeildin á Landsbókasavninum veitir bókasøvnum tænastur, tá ið tað snýr seg um keyp av bókum og øðrum bókasavnstilfari. 

Bókasavnsskipanin

Flestu bókasøvn í landinum brúka bókasavnsskipanina Reindex. Landsbókasavnið tekur sær av at gera skrásetingar til alt bókasavnstilfarið í Reindex, meðan bókasøvnini í flestu førum sjálvi leggja eintøk inn í skrásetingina. Bókasøvnini hava tískil sín egna bókagrunn og lánarayvirlit.

Ein vegleiðing til bókasavnsskipanina Reindex kann heintast her við at klikkja á hendan tekstin.

Lánarakort o.a. fæst frá Innkeypsdeildini soleygk@lbs.fo

Eru trupulleikar við skipanini, sendið so fráboðan til okkara kt-tænastufólk.
Landsbókasavnið savnar á hvørjum ári nýtsluhagtøl um útlán, bókastovn o.a. Tølini verða brúkt í ársfrágreiðingini hjá Landsbókasavninum og til útrokning av bókasavnsgjaldinum.

Ókeypis at brúka bókasøvnini

Í bókasavnslógini er ásett at bókasøvn skulu veita fría og ókeypis atgongd til upplýsing, lærdóm og mentan. Bókasøvnini skulu stimbra fólkaræðisliga rættin at taka lut í samfelagnum og at mennast, hugsa, tosa og skriva frítt eins og tey skulu tryggja mentanararvin, ið bókasøvnini varða av.

Til endamálið hava bókasøvnini til taks bøkur og annað tilfar, ið stimbrar lesihug og er viðkomandi, dygdargott og fjølbroytt. Hugsjónarlig, politisk og átrúnaðarlig sjónarmið ella handilslig áhugamál mugu ikki ávirka útboðið av tilfarinum.

Tað stendur øllum íbúgvum landsins í boði frítt og ókeypis at nýta øll fólkabókasøvn í landinum. 

Fjarlán

Landsbókasavnið samstarvar við bæði føroysk og útlendsk bókasøvn um fjarlán. Í hesum sambandi hevur Landsbókasavnið gjørt vegleiðindi fjarlánsviðtøkur fyri føroysk bókasøvn, herundir eisini Landsbókasavnið. Øll bókasøvn, stovnar og virkir í Føroyum kunnu vegna sínar egnu lánarar/brúkarar læna bókligt tilfar frá útlendskum bókasøvnum gjøgnum Landsbókasavnið.

Aðrar bókasavnstænastur

Landsbókasavnið heldur saman við m.ø. nøkrum bókasøvnum og skúlum tíðarrit, greinir, bøkur, handbøkur o.tíl., sum eru at finna á netinum. Talan er um nøkur av teimum frægastu verkunum av slíkum slag, sum verða boðin út á netinum. 

Tað kostar at brúka tey flestu av hesum verkunum, og er atgeingið tí avmarkað til tey bókasøvn og skúlar, sum eru við í samstarvinum. Vitjandi á Landsbókasavninum hava ókeypis atgongd til allar hesar tænastur. 

Einstøk verk kunnu øll brúka ókeypis.

Øll fólkabókasøvnini í Føroyum hava møguleika til at veita e- og ljóðbøkur til teirra lánarar á talgilda pallinum eReolen. Her finnur tú eisini tær føroysku ljóðbøkurnar. Meira kunning um eReolen her

Samstarv við stovnsbókasøvn

Landsbókasavnið samstarvar við miðnámsskúlar og stovnar um bókasavnsvirksemi.
Bókasøvnini, sum fáa tænastur frá Landsbókasavninum, hava teirra bókastovn skrásettan í bókasavnsskipanini Reindex.

Landsbókasavnið samstarvar við Fróðskaparsetrið og aðrar útbúgvingar- og granskingarstovnar um at veita atgongd til vísindaligar leitigrunnar, tíðarrit og fakligar e-bøkur á netinum. Hetta samstarv verður kallað FRIS og merkir Faroese Research Information System

Bókasavnskunning 

Landsbókasavnið skipar javnan fyri bókasavnskunning. Er talan um bólkar ella skúlaflokkar, ber til at bíleggja tíð til kunning á tlf. 340525. 

Tað ber eisini til hjá bókasøvnum at heita á fólk frá Landsbókasavninum at koma at undirvísa teirra lánarum/brúkarum í leiting við bókasavnsskipanini Reindex.