Tann 19. august komu kvæða- og vísuhandritini Sandoyarbók og Hentzasavn (Færøiske Qvæde) aftur til Landsbókasavnið. Tey vóru avhendað av Birgit Vinther Hansen, konservator á Kongaliga bókasavninum í Keypmannahavn, har tey hava verið til eftirlit hjá henni.

Landsbókasavnið hevur havt bæði handritini til láns og til varðveitslu í meir enn 30 ár. Í hesum tíðarskeiði hava handritini regluliga verið til eftirlit hjá savnsvørðum á Kongaliga bókasavninum.

Søgan byrjaði við, at landsstýrið í 1987 setti eina nevnd at virka fyri, at handrit og skjøl av føroyskum uppruna, ella handrit og skjøl sum høvdu stóran mentanarligan týdning, vórðu flutt til Føroya. Eftirfylgjandi var framsýning hildin í Norðurlandahúsinum í 1990 við skjølum og handritum úr Svøríki, Danmark og Føroyum. Her vórðu hesi bæði handritini sýnd fram.

Til hetta høvi handaði svenski mentamálaráðharrin Føroya landsstýri Kongsbókina (skinnhandrit út miðøld, sum inniheldur Seyðabrævið og Hundabrævið), sum nú verður varðveitt á Tjóðskjalasavninum.

Fýra ár seinni, í 1994, fekk Landsbókasavnið Sandoyarbók (DFS 1883/068) og Hentzasavn (NKS 1954 kvart), aftur til Føroya til langtíðarláns. Hetta var í sambandi við, at 200 ár vóru liðin, síðani kvæðasavnarin Jóannes í Króki (1794-1869) varð borin í heim. Tað var hann, sum skrivaði upp kvæðini í báðum hesum handritunum í tíðarskeiðnum 1817-1831. Kvæðahandritini vórðu avhendað á almennum hátíðarhaldi á Føroya landsbókasavni 26. november 1994.

Sandoyarbók hoyrir til savnið hjá Svend Grundtvig, professara (1824-1883), sum Kongaliga bókasavnið fekk til varðveitslu frá Dansk Folkemindesamling. Grundtvig hevði keypt handritið frá arvingum Jóannesar í Króki. Hentzasavn inniheldur tey kvæðini og vísurnar, Jóannes varð biðin um at skriva upp av amtsprósti Peter Matthiesen Hentze (1753-1843), tá ið Peter Erasmus Müller (1776-1834) heitti á fleiri kvæðainnsavnarar í Føroyum at fara undir at innsavna kvæði og senda uppskrivingarnar til Keypmannahavnar. Hetta aftan á at H. C. Lyngby hevði verið í Føroyum í 1817.

Hentzasavn er talgildað av Kongaliga bóksavninum.