“Stuttligur kann hann eisini vera” fólksligi og klassiski skaldskapurin hjá Heðini Brú

Hans Jacob Jacobsen var føddur í Skálavík í 1901 og andaðist í Havn í 1987. Tað eru í ár 125 ár síðani, hann varð føddur. Hans Jacob skrivaði undir navninum Heðin Brú, og í bókum sínum lýsti hann lív og umstøður hjá fólki í realistiskum skaldsøgum og stuttsøgum. Í føroyskari bókmentasøgu eru prosaverkini hjá Heðini Brú millum fremstu dømini um realismuna í 1930’unum.

Kendasta verkið hjá Heðini er helst skaldsøgan Feðgar á ferð. Hon kom út á fyrsta sinni í Varðanum sum framhaldssøga í 1936 og kom út í bók í 1940. Heðin Brú er ein føroyskur klassikari. Skaldskapur hansara røkkur út um sína egnu tíð og kann tulkast aftur og aftur. Á Landsbókasavninum eru vit so heppin, at familjan hevur latið okkum handrit, lummabøkur, brøv og annað hjá Heðini. Í samband við føðingardagin hava vit gjørt eina framsýning við einum úrvali av brøvum, handritum og lummabókum. Framsýning er frá 17. august til 11. september.